Mga programa, proyekto sa Tumpagon mapatuman na

MAPATUMAN na sa Barangay Tumpagon, ning syudad, ilang mga programa ug proyekto nga gihatagan og prayoridad karong tuiga.

Kini human ang Konseho sa sesyon niadtong Lunes nga gidumala ni Bise Mayor Bebot Rodriguez misagop og resolusyon nga nag-uli sa ordinansa  sa maong barangay nga may kalabotan sa ilang Annual Budget.

Lakip sa gipundohan sa maong budget ang pagrehabilitar sa kadalanan balor P100 mil ug sistema sa ilang panubig balor P231 ,969, pagsemento sa pathways P300 mil ug pagtukod og drainage nga mokabat sa P100 mil.

Dugtong niini, migahin usab ang barangay og igong pundo alang sa Sangguniang Kabataan sa kantidad P466,385 ug 5 porsyentong Calamity Fund nga mokabat sa P233,192. Ang maong lakang  miagi  sa makuting pagtuon  sa mga hintungdang komite sa konseho.

Ang resolusyon nga gisagop sa Konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ug Reglamento ubos ni Konsehal Edgar Cabanlas.