Mga programa, proyekto sa Tablon karong 2023 mapatuman na

GIUYONAN na sa konseho sa syudad sa sesyon niadtong Lunes nga gidumala ni Bise Mayor Jocelyn Rodriguez ang resolusyon nga nag-uli sa ordinansa sa Barangay Tablon diin nasukip ang ilang 2023 Annual Budget nga adunay gibanabanang kinitaan ug galastohon balor P39,063,152.00.

Tipik sa gigahinan sa barangay mao ang proyekto pagsemento sa dalan sa Purok 3, pagrehabilitar sa concrete pavement ug multi-purpose hall ug Tablon Cemetery.

Migahin usab ang barangay og igong pundo alang sa programa sa Sangguniang Kabataan (SK), pagpalit og usa ka unit nga rescue vehicle, mga kahimanang magamit panahon sa rescue ug retrieval operation, pagpalit og mga personal protective equipment ug food relief nga magamit panahon sa kalamidad.

Ang resolosyon nga gisagop sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Edgar Cabanlas.