Mga programa, proyekto sa kabatan-onan sa brgys Bayanga, Pagatpat mapatuman

MAPATUMAN sa dili madugay sa kabatan-onan sa Barangay Bayanga ug Pagatpat ang ilang mga proyekto ug programa alang karong tuiga.

Kini human padayong gitun-an sa komite sa Sports and Youth Development ni Konsehal John Michael Seno ang gisumeteng 2022 Annual Budget sa Sangguniang Kabataan (SK) sa duha ka barangay.

Ang Bayanga migahin og balor P654,535.00 aron magamit nga pundo pagpatuman sa mga proyekto ug programa karong tuiga samtang ang Pagatpat migahin og P2 milyones kapin.

Gilantawng ang mga programa ug proyekto magdala og kaayohan sa kabatan-onan sa nahisgotang duha ka barangay. Ang gisumeteng Annual Budget miagi sa makuting pagsusi sa mga hintundang buhatan sa City Hall aron maseguro nga nahisubay kini sa balaod.

Niini, si Konsehal Seno malaumon nga makatambong ang mga opisyal sa SK sa barangay Bayanga ug Pagatpat aron mapaabot ang ilang katin-awan sa giplanong mga programa ug proyekto.