Mga programa, proyekto sa brgy Tumpagon mapatuman na

HINGPIT nang mapatuman sa konseho sa barangay Tumpagon ang ilang mga programa ug proyekto karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez misagop og resolusyon nga nag-uli sa ordinansa sa maong barangay diin nasukip ang ilang 2022 Annual Budget nga adunay gibanabanang kinitaan ug galastohon balor P5,227,404.00.

Lakip sa ilang gihatagan sa prioridad mao ang proyekto pagsemento sa hallway sa tunghaang sekondarya sa barangay, pagtukod og pampublikong pansayan, pagtukod og multi-purpose hall nga magsilbing reading center ug uban pang mga proyekto nga gilantawng maghatag og kalamboan sa ilang dapit.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya.