Mga programa, proyekto sa Brgy San Simon mapatuman na

MAHIMO nang ipatuman sa Barangay San Simon ang ilang mga programa ug proyekto nga  gipundohan karong tuiga.

CDO City Council programa, proyekto sa Brgy San Simon

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 annual budget nga adunay gibanabanang kinitaan ug galastohon balor P7,513,606.

Lakip sa gipundohan mao ang ilang 20 porsyentong (20%) development fund balor P652,607.00; samtang P751,361 usab ang gigahin alang sa pagpatuman sa mga programa sa Sanguniang Kabataan; P375,680 alang sa barangay disaster risk reduction management fund; P25 mil sa programa sa senior citizen ug PWDs; P200,000 ang gigahin alang sa pag-rehabilitar sa ilang multipurpose hall ug uban pang mga programa nga gilantaw’ng maghatag ug dugang kaarangan sa ilang serbisyo ngadto sa katawhan.

Ang 2024 annual budget sa Barangay San Simon miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.