Mga programa, proyekto sa Brgy. Puerto mapatuman na

MAHIMO nang ipatuman sa Barangay Puerto ang ilang gihan-ay nga mga programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan ug galastuhon balor P21,016,784.00.

Lakip sa gipundohan mao ang 20 porsyentong (20%) Development Fund balor P3,369,577.00; samtang P2,101,679.00 usab ang gigahin alang sa pagpatuman sa mga programa sa Sangguniang Kabataan; P1,050,839.00 alang sa Barangay Disaster Risk Reduction Management Fund; P450,000.00 alang sa rehabilitasyon sa Multi-Purpose Hall; P2,569,577.00 ang gigahin pagpalit sa ilang sakyanan alang sa paghakot sa mga basura sa barangay ug uban pang mga programa nga gilantawng maghatag kaarangan sa ilang serbisyo ngadto sa katawhan.

Ang 2025 annual budget sa Barangay Puerto miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas. (MLRapanot/SP)