Mga programa, proyekto sa Brgy Pagatpat mapatuman na

GIUYUNAN na sa Konseho sa Syudad sa sesyon niadtong Lunes nga gidumala ni Bise Mayor Kikang Uy ang resolusyon nga nag-uli sa ordinansa Barangay Pagatpat diin nasukip ang ilang 2022 Annual Budget nga adunay gibanabanang kinitaan ug galastohon balor P20,972,953.00.

Gihatagan og prioridad sa barangay ang pagpalambo ug pagrehabilitar sa mga proyekto sa imprastraktura, pagpalit og supplies ug ekipo aron magamit panahon sa pagpanginahanlan nga gilantawng magpalambo sa kinabuhi sa katawhan sa barangay.

Si konsehal Yan Lam Lim, chairman sa Komite sa Barangay Affairs ug nagpaluyo sa gipasakang resolusyon, mibutyag nga iyang gisuportahan ang maong lakang kay gitumong niini ang kalamboan sa barangay.

Ang resolusyon nga gipasaka sa konseho alang sa maong katuyuan gipaluyohan usab sa Komite sa Pamalaod ni Konsehal Ian Mark Nacaya.