Mga programa, proyekto sa Brgy Pagalungan mapatuman na

MAHIMO nang ipatuman sa Barangay Pagalungan ang ilang mga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastuhon balor P 6,569,276.00.

Lakip sa gipundohan mao ang 20-porsyentong (20%) development fund balor P797,735.00; samtang P656,928.00 usab ang gigahin alang sa pagpatuman sa mga programa sa Sangguniang Kabataan; P328,464.00 alang sa Barangay Disaster Risk Reduction Management Fund; P15 mil sa Gender Development Program; ₱30 mil sa programa sa senior citizens ug PWDs ug uban pang mga programa nga gilantaw’ng maghatag ug dugang kaarangan sa ilang serbisyo ngadto sa katawhan.

Ang 2024 annual budget sa Barangay Pagalungan miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon. Ang resolusyon nga gipalabang sa konseho alang sa maong katuyuan gipaluyohan sa Komite saBarangay Affairs ni Konsehal Yan Lam Lim Komite sa Pamalaod ni Konsehal Edgar Cabanlas.