Mga programa, proyekto sa Brgy. Indahag mapatuman na

MAHIMO nang ipatuman sa Barangay Indahag ang ilang mga programa ug proyekto nga gipundohan karong tuiga.

Kini human ang Konseho sa Syudad atol sa sesyon sa Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan ug galastuhon balor P25,579,470.00.

Lakip sa gipundohan mao ang 20 porsyentong (20%) Development Fund balor P4,417,678.00 samtang P2,557,947.00 usab ang gigahin alang sa pagpatuman sa mga  programa sa Sangguniang Kabataan; P1,278,974.00 alang sa Barangay Disaster Risk Reduction Management Fund; P1,000,000.00 ang gigahin alang sa pagtukod sa ilang public comfort rooms; P1,000,000.00 alang sa rehabilitasyon ug instalasyon sa street lighting facilities; P300,000.00 ang gipundo alang sa ilang panubig sa tibook sitio sa barangay ug uban pang mga programa nga gilantaw’ng maghatag ug dugang  kaarangan sa ilang serbisyo ngadto sa katawhan.

Ang 2025 annual budget sa Barangay Indahag miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang mapatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (MLRapanot/SP)