Mga programa, proyekto sa Brgy Bugo mapatuman

HAYAN mapatuman na sa barangay Bugo ang ilang mga programa ug proyekto karong tuiga.

Kini human ang konseho sa syudad sa sesyon kagahapon nga gidumala ni bise mayor Kikang Uy misagop sa resolusyon nga nag-uli sa ordinansa sa barangay diin nasukip ang 2021 annual budget nga adunay gibanabanang gahin ug galastohon balor P29,506,391.00.

Si konsehal Yam Lam Lim, chairman sa komite sa barangay affairs ug usa sa mga nagpaluyo sa gisagop nga resolusyon, mibutyag nga iyang gisuportahan ang maong lakang human nakita nga nahiuyon kini sa balaod ug dako og ikatabang alang sa kaarangan ug kalamboan sa katawhan sa barangay.

Ang resolusyon nga gisagop sa konseho alang sa maong katuyuan gipaluyuhan usab sa komite sa pamalaod ni konsehal Ian Mark Nacaya. (SP/MLRapanot)