Mga programa, proyekto sa Brgy 35 SK mapatuman na

MAPATUMAN na sa hingpit sa mga opisyal sa Sangguniang Kabataan (SK) sa Barangay 35 ang ilang mga programa ug proyekto nga gilantaw’ng maghatag og dugang kaarangan sa kinabuhi sa kabatan-onan.

Kini human ang konseho sa syudad sa milabayng sesyon nga gidumala ni Bise Mayor Bebot Rodriguez misagop sa resolosyon nga nag-uli sa resolosyon sa Barangay 35 diin nasukip ang 2022 SK Annual Budget balor P594,674.00.

Ang maong budget gamiton sa pagpatuman sa ilang mga programa og proyekto nga gihatagan og prayoridad niining tuig subay sa probisyon sa RA 10742 kon Sangguniang Kabataan Reform Act of 2015.

Tipik sa gipundohan sa budget mao ang programa pagpalambo sa paugnat sa kusog, pagproteher sa kinaiyahan, paghatag og edukasyon kabahin sa kampanya kontra droga, pagpamalit ug usa ka unit nga desktop computer with printer ug mga muebles ug uban pang galamiton sa ilang buhatan.

Si Konsehal John Michael Seno, chairman sa komite sa Sports and Youth Development kinsa usa sa nagpaluyo sa gisagop nga resolosyon, mipadayag sa iyang suporta sa maong lakang human nakita nga nahisubay kini sa balaod ug dako ang ikatabang sa kaarangan ug kalamboan sa kabatan-onan sa dapit.

Ang resolosyon nga gipalabang sa konseho alang sa maong katuyoan gipaluyuhan usab sa komite sa pamalaod ni Konsehal Ian Mark Nacaya. (SP/RNQuiblat)