Mga programa, proyekto sa Brgy. 31 mapatuman na

HINGPIT nang ipatuman sa Barangay No. 31 ang ilang mga programa ug proyekto nga gipundohan karong tuiga.

Kini human ang Konseho sa Syudad sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibana-banang kinitaan ug galastohon balor P8,171,985.00.

Lakip sa giponduhan mao ang 20 porsyentong development fund balor P450,978.00 samtang P817,199.00 alang sa pagpatuman sa mga programa sa Sanguniang Kabataan; P150,000.00 alang sa rehabilitasyon sa ilang multi-purpose hall; P250,000.00 sa alang sa  paghinlo sa mga  kanal; P50,000.00 alang sa  pag-instalar og mga street lights ug uban pang mga programa nga gilantawng  maghatag kaarangan sa ilang pag-serbisyo ngadto sa katawhan.

Ang 2024 annual budget sa Barangay 31 miagi sa makuting pagtuon sa mga hintundang komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa nasangpit nga katuyuan gipaluyohan sa Komite sa Barangay Affairs ubos ni Konsehal Yan Lam Lim ug Komite sa Pamalaod ni Konsehal Edgar Cabanlas.