Mga programa, proyekto sa Brgy. 3 mapatuman na

MAHIMO nang ipatuman sa Barangay 3 ang ilang mga programa ug proyekto nga gipundohan karong tuiga.

Kini human ang konseho sa syudad atol sa ilang sesyon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastuhon nga P3,399,476.00.

Lakip sa gipundohan mao ang 20 porsyentong (20%) Development Fund balor P 343,895.00; samtang P339,948.00 usab ang gigahin alang sa pagpatuman sa programa sa Sangguniang Kabataan; P169,974.00 alang sa Barangay Disaster Risk Reduction Management Fund: P5,000 sa programa sa senior citizens ug PWDs ug uban pang mga programa nga gilantaw’ng maghatag og dugang kaarangan sa ilang serbisyo ngadto sa katawhan.

Ang 2024 annual budget sa barangay 3 miagi sa makuting pagtoon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.