Mga programa, proyekto sa Brgy. 21 mapatuman na

HAYAN mapatuman na sa Barangay 21 ang ilang mga gihan-ay nga programa ug proyekto nga gipundohan karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastohon balor P3,424,992.00.

Lakip sa gipundohan mao ang 20 porsyentong development fund balor P410,917.00; P342,499.00 ang gigahin alang sa pagpatuman sa mga programa sa Sanguniang Kabataan; P200,000.00 alang sa pagrehabilitar sa drainage system sa Zone-1; P110,000.00 alang sa pag-instalar og street lights ug solar system ug uban pang mga programa nga gilantawng maghatag og dugang kaarangan sa ilang serbisyo  ngadto sa katawhan.

Ang 2024 annual budget sa maong barangay miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gisagop  sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.