Mga programa, proyekto sa Brgy. 20 mapatuman na

MAHIMO nang ipatuman sa Barangay 20 ang ilang mga gihan-ay nga  programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 annual budget nga adunay banabanang kinitaan ug galastuhon balor P3,154,393.00.

Lakip sa  gipundohan mao ang 20 porsyentong (20%) Development Fund balor P341,439.00; samtang P315,439.00 ang gigahin alang sa pagpatuman sa mga programa sa Sangguniang Kabataan; P170,664.00 alang sa rehabilitasyon sa ilang drainage system; P47,316.00 alang sa Barangay Disaster Reduction Management; P30,000 alang sa pagtabang sa programa sa Senior Citizen ug  PWDs ug uban pang mga programa nga gilantawng maghatag og dugang kaarangan sa ilang serbisyo ngadto sa katawhan.

Ang 2024 annual budget sa Barangay 20 miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa nasangpit nga katuyoan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.