Mga programa, proyekto sa Brgy. 16 mapatuman na

MAHIMO nang ipatuman sa Barangay 16 ang ilang mga programa ug proyekto nga gipundohan karong tuiga.

Kini human ang Konseho sa Syudad sa milabayng sesyon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang supplemental budget nga adunay gibanabanang kinitaan ug galastuhon balor P840,346.00.

Lakip nga gipundohan mao ang pagmintinar sa mga ekipong gipanag-iyahan sa barangay balor P100 mil, pundo pagtambong sa mga opisyal ug kawani sa barangay sa trainings ug seminars balor P100 mil, ug pagpalit og dugang office supplies balor P40 mil, ug uban pang galastohon nga haum sa panginahanglan sa katawhan.

Ang supplemental budget sa Barangay 16 miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing daling panahon.

Ang resolusyon nga gipalabang sa konseho alang sa maong katuyuan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.