Mga programa, proyekto sa Brgy. 11 mapatuman na

HAYAN mapatuman na sa Barangay 11 ang ilang mga programa ug proyekto nga gipundohan karong tuiga.

Kini human ang Konseho sa Syudad sa sesyon niadtong Martes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastohon balor P3,574,389.00. Lakip sa gipundohan mao ang 20 porsyentong (20%) Development Fund balor P 372,934.00.

Samtang P357,439.00 usab ang gigahin alang sa pagpatuman sa mga programa sa Sanguniang Kabataan; P178,719.00 ang gigahin alang sa pagpamalit ug calamity supplies ug ekipo ug pagpahigayon sa training agig pagpangandam panahon sa kalamidad; P150,000.00 pagrehabilitar sa ilang drainage system ug uban pang mga programa nga gilantawng maghatag kaarangan sa ilang serbisyo ngadto sa katawhan.

Ang 2024 annual budget sa Barangay 11 miagi sa makuting pagtoon sa mga komite sa konseho ug nasuta nga nahiuyon sa balaod ug mahimo nang mapatuman.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.