Mga programa, proyekto sa Bonbon mapatuman na

HINGPIT ng mapatuman sa konseho sa barangay Bonbon ang ilang gihan-ay nga mga programa ug proyekto karong tuig 2022.

Kini human ang konseho sa syudad sa sesyon kagahapon nga gidumala ni Bise Mayor Jocelyn Rodriguez misagop sa resolusyon nga nag-uli sa ordinansa sa Bonbon diin nasukip ang ilang Annual Budget nga adunay gibanabanang kinitaan ug galastohon balor P15,035,280.00.

Niini, gigahinan sa barangay gikan sa maong annual budget ang pagpatuman sa mga programa ug proyekto ubos sa 20% Development Fund nga mobalor og P2.66 milyones kapin.

Lakip sa gipundohan mao ang pagrehabilitar sa ilang multipurpose hall ug pagpalambo sa day care ug health centers, pagtukod og barangay tanod outpost ug paghinlo sa mga kanal.

Gipundohan usab og 10% gikan sa kinatibuk-ang budget ang mga programa ug proyekto sa Sangguniang Kabataan nga mobalor og P1.5 milyones ingon man 5% calamity fund nga kapin sa P751 mil.

Gilaraw sa barangay nga makapalit og mga materyales ug ekipo nga magamit panahon sa kalamidad ug daghan pang uban nga gilantawng makatabang sa katawhan.

Ang resolusyon nga gisagop sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ni Konsehal Ian Mark Nacaya.