Mga programa, proyekto sa Bayanga mapatuman na

MAHIMO nang ipatuman sa Barangay Bayanga ang ilang mga programa ug proyekto nga nahan-ay karong tuiga.

Kini human ang Konseho sa Syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibana-banang kinitaan ug galastohon balor P6,222,751.00.

Gihatagan og prayoridad sa barangay nga mapatuman karong tuiga ang mga proyekto ug programang gipundohan ubos sa 20% Development Fund nga naglakip sa proyekto pagrehabilitar sa material recovery facility,  pagtukod og multi-purpose hall og pathway, pagtul-id sa kadalanan ug sistema sa panubig, ug pagkoral sa day care center.

Gipundohan usab sa barangay ang pagtunol og benepisyo ngadto sa mga kawani, maintenance expenses lakip na sa training, gamit sa opisina, programa sa nutrisyon, panglawas, GAD, ug uban pang operating expenses.

Dugang gigahin ang 5% Calamity Fund nga motubag sa panginahanglan sa katawhan panahon sa kalamidad, 10% SK Fund alang sa programa sa kabatan-onan, ug uban pang mga programa nga gilantawng maghatag og dugang kalamboan sa kinabuhi sa katawhan sa barangay.

Ang resolusyon nga gipalabang sa Konseho alang sa maong katuyuan gipaluyohan sa Komite sa Barangay Affairs ni Konsehal Yan Lam S. Lim ug Komite sa Pamalaod ni Konsehal Edgar Cabanlas. (JRGalano/SP)