Mga programa, proyekto sa Barangay Puntod mapatuman na

MAHIMO nang ipatuman sa Barangay Puntod ang ilang mga gihan-ay nga programa ug proyekto nga gipundohan karong tuig 2024.

Kini human ang Konseho sa Syudad sa sesyon niadtong Lunes  sesyon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay  nga may kalabutan ang ilang 2024 Annual Budget nga adunay gibanabanang kinitaan ug galastohon balor P31,149,793.00.

Lakip sa gipundohan sa maong budget ang  20% Development Fund balor P3,889,758.00 samtang P3,114,979.00 ang gigahin alang sa pagpatuman sa mga programa sa Sangguniang Kabataan (SK).

Gigahina usab sa barangay og igong pundo  ang proyekto sa barangay  nga pagbuhat  og ilang footbridge sa District-2 balor P150,000.00; P1.5 milyones alang sa paghinlo sa mga canals; P250,000.00 alang pag-rehabilitar sa pathways ug barangay roads ug uban pang mga programa nga maghatag ug dugang kaarangan ug kalamboan sa ilang barangay.

Nasayran ang budget sa Puntod miagi sa makuting deliberasyon sa mga hintungdan  Komite sa Konseho ug nasuta nga nahiuyon sa balaod ug mahimo nang ipatuman sa labing daling panahon.

Ang resolusyon nga gipalabang sa konseho alang sa nasangpit nga katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.