Mga programa, proyekto sa Barangay Macabalan mapatuman na

MAHIMO nang mapatuman sa Barangay Macabalan ang ilang mga programa ug proyekto nga gipundohan karong tuiga.

Kini human ang Konseho sa Syudad sa sesyon sa Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastohon balor P22,092,370.00.

Lakip sa gipundohan mao ang 20% Development Fund balor P4,038,474.00 samtang P2,209,237.00 usab ang gigahin alang sa pagpatuman sa programa sa Sanguniang Kabataan, P50 mil sa Gender Development Program, P201,923.00 alang sa programa alang sa mga hamtong ug PWD, ug uban pang mga programa nga gilantawng maghatag og kaarangan sa ilang serbisyo ngadto sa katawhan.

Ang 2024 annual budget sa Macabalan miagi sa makuting pagtuon sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas, ug nasuta nga nahiuyon sa balaod ug mahimo nang mapatuman.