Mga programa, proyekto sa Barangay Bonbon mapatuman na

MAHIMO nang ipatuman sa Barangay Bonbon ang ilang mga gitinguhang programa ug proyekto nga gipundohan karong tuiga.

Kini human ang Konseho sa Syudad sa sesyon kagahapon  nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang galastohon balor P14,097,196.00.

Lakip sa gipundohan mao ang 20% Development Fund balor P2,416,439.00 samtang P1,409,720.00 ang gigahin alang sa pagpatuman sa mga programa ug proyekto sa Sangguniang Kabataan; P900,000.00 alang sa pag-rehabilitar sa ilang multi-purpose hall samtang tag P50,000.00 ang gigahin nga pundo paghimo ug mga pathway sa Zones-1, 4, 5 ug 7 sa maong barangay ug uban pang mga programa nga gilantawng maghatag dugang kaarangan sa ilang pagserbisyo sa katawhan.

Ang 2024 Annual Budget sa Barangay Bonbon miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman.

Ang resolusyon nga gisagop  sa konseho alang sa nasangpit nga katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.