Mga programa, proyekto sa Balubal maimplementar na

MAHIMO nang maimplementar sa Barangay Balubal ang ilang mga gipangandoy nga programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa baranagay diin nasukip ang ilang 2024 Annual Budget nga adunay gibanabanang kinitaan ug galastohon balor P9,629,379.00.

Lakip sa ilang gipundohan mao ang 20 porsyentong (20%) Development Fund balor P1,667,557.00; P400,000.00 ang gigahin pagsemento sa ilang barangay road; P300,000.00 usab ang gitagana alang sa pagrehabilitar sa ilang multi-purpose hall ug uban pang mga programa nga gilantawng maghatag kaarangan sa ilang pagserbisyo ngadto sa katawhan.

Ang 2024 annual budget sa Balubal miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing daling panahon.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.