Mga programa, proyekto sa Agusan mapatuman na

HINGPIT nang mapatuman sa mga opisyal sa barangay Agusan ning syudad ang ilang mga programa ug proyekto karong tuiga.

Kini human ang konseho nga gidumala ni Bise Mayor Kikang Uy misagop og resolusyon nga nag-uli sa ordinansa sa barangay nga may kalabutan sa ilang 2021 Annual Budget nga adunay gibana banang kinitaan ug galastohon balor P 18, 998, 867 alang sa implementasyon .

Maoy gihatagan sa prioridad sa barangay sa ilang budget ang pag-instalar ug pagmentinar sa mga suga sa kadalanan, pagtukod og dalan gikan sa Zone 1 ngadto sa 7, pagrehabilitar sa drainage system, pagkoral sa ilang training center, pagtukod og multi purpose hall, pagrehabilitar sa barangay isolation unit, pagtukod sa MRF water system, pagtukod og hanging bridge sa Zone 3 Upper, paghinlo sa mga canal ug daghan pang uban.

Si Konsehal Yan Lam Lim, chairman sa komite sa barangay affairs mipasabot nga ang maong budget dako kaayo og ikatabang sa kalamboan sa barangay labina sa serbisyo nga ilang matunol ngadto sa ilang ginsakopan.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni konsehal Lim ug komite sa pamalaod ug reglamento ubos ni Konsehal Ian Mark Nacaya.