Mga program, proyekto sa Lumbia mapatuman na

HINGPIT nang mapatuman sa barangay Lumbia ang ilang mga programa ug proyekto nga gihatagan og prayoridad karong tuiga.

Kini human ang konseho sa syudad ubos ni bise mayor Kikang Uy sa sesyon kagahapon, misagop sa resolosyon nga nag-uli sa ordinansa sa barangay diin nasukip ang gisumeteng 2021 Annual Budget.

Ang maong budget adunay gibanabanang gahin ug galastohon balor P26 milyones kapin.

Si konsehal Yan Lam Lim, chairman sa komite sa barangay affairs ug usa sa nagpaluyo sa gisagop nga resolosyon, mibutyag nga iyang gisuportahan ang maong lakang human nakita nga nahiuyon kini sa balaod ug dako ang ikatabang alang sa kaarangan ug kalamboan sa nahisgotang barangay.

Ang resolosyon nga gisagop sa konseho alang sa maong katuyuan gipaluyohan usab sa komite sa pamalaod ni konsehal Ian Mark Nacaya. (SP/MLRapanot)