Mga negosyante makapahimulos sa tax relief sulod sa 6 ka bulan

Mahatagan pa og dugang panahon ang mga magpapatigayon pagpahimulos sa gitanyag nga tax relief sa kagamhanan sa dakbayan sa Cagayan de Oro.

Kini human gipalabang sa konseho sa syudad ubos ni Bise Mayor Bebot Rodriguez ang Ordinance No. 14429-2023 nga nag-amendar sa pipila ka probisyon sa Ordinance No. 14385-2022 kon Tax Relief Ordinance of 2022.

Ubos sa ordinansa, ang mga magpapatigayon nga nag-operate nga walay mayor’s permit, kadtong mga napakyas pagretiro sa ilang mga business permits ug adunay delinkwenteng buluhisan mahimong makapahimulos sa gitanyag nga tax relief sama sa dili pagbayad sa penalties, interests ug surcharges sa delinkwenteng principal tax kun makabayad sa 30% tax.

Dugang pa, gilugwayan usab sa konseho ang pag-avail sa maong tax relief gikan sa tulo ka bulan ngadto sa unom ka bulan gikan sa pagpalabang sa ordinansa.

Ang gipalabang nga ordinansa gipangamahanan nila ni Konsehal Ian Mark Nacaya ug Alam Lim.