Mga mangingisda dihas Gusa gipaabot makapahimulos sa programa sa BFAR

GIPAABOT konsiderahon sa konseho sa syudad ubos ni Bise Mayor Kikang Uy ang sugyot ordinansa nga maghatag og katungod ni Mayor Oscar Moreno pagpirma sa Memorandum of Agreement (MoA) tali sa Bureau of Fisheries and Aquatic Resources, (BFAR) Region-10, Gusa Seaside Fisherfolk Association.

Kini naglangkob sa pagpatuman sa proyektong ipang-apod-apod nga Norwegian cage ngadto sa mga gitumbok nga benepisyaryo sa maong asosasyon.

Sa gisugyot nga MoA, ang BFAR ang mohatag og motorized fiberglass Reinforced Plastic Boat ug mohitsas sa mga mangingisda sa gikinahanglang kahibalo sa pagbuhi ingon man sa produksyon sa bangus (fingerlings) samtang ang kagamhanan mao ang magrekomendar sa mga benepisyaryo alang sa maong programa ug uban pa.

Si Bise Mayor Uy malaumon nga ang programa makatabang sa katawhan sa dakbayan alang sa malungtarong pamaagi sa pagpangisda sa ingon mahatagan usab og kaarangan ang ilang mga kinabuhi.