Mga mamaligyaay sa talipapa nasutang adunay biz permits

SI konsehal George Goking, chairman sa komite sa trade & commerce uban sa City Price Coordinating Council, DTI ug Department of Agriculture, mipahigayon sa pagsusi sa mga presyo sa karneng baboy.

Kini human namatikdan ang hilabihan nga pagsaka sa presyo sa karneng baboy ug ubang produktong ginama gikan niini.

Ang mga dapit nga gisusi sa grupo mao ang mga talipapa dihas mga barangay ug nasuta nga kini adonay mga business permits.

Mahinumdoman nga ang komite mipahigayon sa pakisusi sa gipaabot nga mulo sa mga negosyante nga walay business permits ang mga mamaligyaay sa mga talipapa ug gitumbok nga usa kini sa hinungdan sa pagkunhod sa kinitaan diha sa kamerkadohan.

Si Goking mipasabot nga ang kasulbaran sa taas nga presyo mao ang supply sa baboy nga mas labaw karon nga nagminus tungod sa sakit nga African Swine Fever (ASF) nga matod pa nakaapekto og dako sa mga backyard hog raiser.

Sa bahin sa mga negosyante mubo na kayo ang ilang presyo apan sa bahin usab sa mga konsumante taas kaayo kini ilabina nga panahon sa pandemya. Si konsehal Goking nanghinaut nga magsinabtanay ang tanan uban sa pag-ampo aron mabuntog ang gisagubang nga kalisod.