Mga lisensyadong bulangan lang mahatagan sa panugot - Abaday

Gitin-aw ni Konsehal Roger Abaday, chairman sa komite sa games and amusement, nga kadtong mga lisensyadong bulangan lang ang mahatagan sa panugot makapahigayon og sabong ug dili pwede ang tari-tari pinasikad sa PD 449.

Kini ang pasabot ni Abaday atol sa milabayng tigom sa iyang komite human nagpadangat sa ilang aplikasyon ang konseho sa barangay Bayabas nga makapahigayon og sabong nunot sa kasaulogan sa ilang kapistahan.

Matod sa konsehal nga tataw nga nahilatid sa balaod nga ang buhatan sa mayor lang ang gitugotan nga maka-isyu sa permit ngadto sa mga lisensyadong bulangan.

Dugang pa, dili angayang tugutan ang bisan unsang matang sa illegal gambling kay salikwa-ot sa mata sa katilingban, pasabot ni Abaday.

Gani, matod niya, adunay panghitabo didto sa Leyte nga nahatagan sa permit ang maong tari-tari ug nag-atubang karon ang mga opisyal sa gobyerno sa tukmang kaso ug kini ang gusto likayan nga mahitabo dinhi sa syudad.

Niini, malaumon si Abaday nga masabtan kini sa kadaghanan nga ang konseho sa syudad igo lamang nagsunod sa nahilatid sa balaod.