Mga lakang pagkunhod sa carbon emission suportado ni Abbu

“TINGALI aduna kitay kalibog sa atong pagahimoong lakang kon asa ang angay suportahan—ang panawagan ba sa Philippine Chamber of Commerce and Industry (PCCI) o ang House Bill (HB) 7705.”

Kini ang pagpatin-aw ni Konsehal Joey S. Abbu, Jr. agig reaksyon sa special report ni Konsehal Bernie Esparcia atol sa regular sesyon sa konseho niadtong Lunes nga gidumala ni Bise Mayor Bebot B. Rodriguez kabahin sa isyu sa carbon emission policy.

Gipasabot ni Abbu nga wala pay ideya ang mga sakop sa konseho kon unsay mga palisiya alang sa ipalabang nga HB 7705 ug ang tumong sa panawagan sa PCCI.

Hinuon, giklaro sa konsehal nga suportado niya ang bisan unsa nga mga lakang sa gobyerno, lokal man o nasyonal, sa paghimo sa mga estratehiya, mga plano ug mga pamaagi alang sa pagkunhod sa carbon emission.

Niini, naglaum si Abbu nga matutokan kini nga isyu diha sa Komite sa Climate Change sa pagdumala ni Konsehal Bernie Esparcia kay dako kini og ikatabang sa pagpreserbar sa kinaiyahan.