Mga kursong gitanyag sa City College aprobado sa Konseho

DUGANG kalamboan sa natad sa edukasyon ang gilantaw nga matagamtaman sa katawhan sa dakbayan sa Cagayan de Oro.Kini human hiniusang giaprobahan sa Konseho sa sesyon niadtong Lunes nga gidumala ni Bise Mayor Bebot Rodriguez ang ordinansa nga nag-aprob sa mga kursong gitanyag sa City College of Cagayan de Oro, subay usab sa City College Governing Board Resolution No. 36-2024.Ang mga kursong gitanyag sa City College ug aprobado na sa Konseho gilangkoban sa mosunod Bachelor of Technology and Livelihood Education (BTLED); Bachelor in Technical-Vocational Teacher Education (BTVTEd); Bachelor of Arts in communication (BA Comm); Bachelor of Science in Entrepreneurial Management (BSEM); Bachelor of Secondary Education Major in Mathematics (BSEd-Math) ug Bachelor of Special Needs Education (BSNEd) diha sa Agusan Campus ug Dansolihon Main Campus.

Lakip sa gitanyag  sa maong mga campuses ang Technical Vocational Programs sama sa Housekeeping NCII;  Carpentry NCII;  Barangay Health Services NCII; SMAW NCI ug NCII; EMS NCII ug Bookkeeping NCII.Samtang gitanyag usab ang Technical Vocational programs diha sa Barangay Kauswagan (Annex) Campus ang EIM NCII; Housekeeping NCII ug Barangay Health Services NCII. Mahinumdoman nga ang Konseho mipalabang sa Ordinance No. 14564-2023 alang sa pagtukod sa City College ug Resolusyon No. 14800-2024 nga nagsagop sa 2024-2029 Institutional Development Plan (IDP) nga gi-require Commission on Higher Education (CHEd) subay sa Memorandum No. 18 series of 2022 aron mahatagan og katumanan ang pag-abli sa maong kolehiyo.

Ang ordinansa nga gipalabang sa Konseho alang sa maong katuyoan gipaluyohan sa Komite sa Edukasyon ni Konsehal Suzette Magtajas-Daba ug dako ang pasalamat sa konsehal sa padayong paghatag sa administrasyon ni Mayor Klarex Uy og igong pagtagad alang sa kaugmaon sa kabatan-onan sa dakbayan.