Mga Kagay-anong tennis champs gipasidunggan

Kusganong gipahalipayan ug gipasidunggan sa Konseho sa Syudad ubos ni Bise Mayor Bebot Rodriguez, ang duha ka mga Kagay-anong nag-una sa ranking sa ilang kategorya sa kalampusang ilang naangkon.

Sa sesyon niadtong Lunes, hiniusang gisagop ang Resolosyon No. 14653-2023 nga nagdayeg ug nagpahalipay ni Kian John Sanchez kinsa nakakuha sa Rank No. 1 sa kategoryang “Boys 16 years old and under” sa Philippine Tennis Association (PhilTA).

Gisagop usab sa konseho ang Resolosyon No. 14654-2023 nga nagdayeg ug nagpahalipay ni Francine Madeline Wong, kinsa nagnumero uno sa kategoryang “Girls 12 years old and under sa Philippine Tennis Association (PhilTA). Si Wong mao usab ang nahimong kampeon sa gipahigayong United States Tennis Association sa Ten Under Junior Circuit Competition nga gihimo didto sa Irvine, California, USA niadtong Hunyo 25, 2023.

Si Konsehal James Judith II, kinsa nangamahan sa gisagop nga mga resolosyon, mibutyag nga dakong garbo sa dakbayan ang kalampusang naangkon sa mga batan-ong Kagay-anon. Ang gisagop nga mga resolosyon gipaluyohan usab sa tanang sakop sa konseho.