Mga Kagay-anong boksidor gipasidunggan

GIPASIDUNGGAN sa Konseho sa Syudad ni Bise Mayor Bebot Rodriguez ang mga Kagay-anong boksidor nga malampusong nakasakmit og medalya atol sa ASBC Asian Youth and Junior Championship didto sa Astana, Kazakhstan.

Sa sesyon niadtong Lunes, gisagop sa konseho ang resolusyon nga nagpasidungog nila ni Ronel Suyom kinsa nakakuha og bronze medal sa flyweight division ug John Paul Napoles nga nakakuha og bronze medal sa feather flyweight division.

Gipasidunggan usab sila si Nick Angelo Payla ug Raymond Lofranco nga nahimong top finalist awardees.

Si Konsehal John Michael Seno, Chairman sa Komite sa Sports and Youth Development ug nangamahan sa gisagop nga resolusyon, mipasabot nga gawas sa dakong garbo nga dala sa mga boksidor sa dakbayan makaaghat usab kini sa kabataan sa naangkon nilang kalamposan. (RNQuiblat/SP)