Mga isyu sa doluna sa rehiyon 10 tukion sa tigom karong adlawa

MAGTAGBO karong alas 9:30 sa buntag dinha sa PSA Regional Statistical Services Office ang mga representante gikan sa lain laing lokal nga kagamhanan sa rehiyon 10 aron magtuki sa pipila ka isyu sa doluna.

Kini ang kasayuran nga gipaabot sa buhatan sa DILG ngadto ni Bise Mayor Bebot Rodriguez sa tinguha nga makatambong ang mga hintungdang representante sa dakbayan ug matuki sa hingpit ang angayang mga lakang nga matubag ang maong mga isyu.

Ang tigom sa buntag gipaabot tambongan sa mga representante sa Malitbog ug Manolo Fortich, Bukidnon; Villanueva ug Tagoloan, Misamis Oriental ug Cagayan de Oro. Samtang sa hapon, gipaabot nga motambong ang mga representante sa Opol, Manticao, ug Lugait, Misamis Oriental; Talakag, Bukidnon; Iligan City ug Cagayan de Oro.

Niini, si Bise Mayor Bebot Rodriguez nagtahas ni Konsehal James Judith II, Chairman sa Komite sa Arbitration, pagtambong sa maong tigom.