Mga IsDa gipasalamat ni Konsehal Suzette

HUGOT nga gipasalamatan ni Konsehal Suzette Magtajas-Daba, chairman sa komite sa edukasyon sa konseho ang mga Iskolar sa Dakbayan (IsDa) sa pag-abag sa pag-apod-apod sa ECQ Special Ayuda nga diin sila nagsilbi isip mga dokumentor sa ilang tagsa-tagsa ka barangay.

Mahinumdoman nga ang maong kalihokan gisugdan niadtong Agosto 6, 2021 aron maabagan ang mga apektadong pamilya nga nawad-an og kinitaan human gipailawom sa Enhanced Community Quarantine (ECQ) ang syudad.

Matod sa konsehal nga tungod sa paningkamot sa kagamhanan nga mahatod gayud nga direkta sa panimalay ang special ayuda gikuha niini ang serbisyo sa mga IsDa alang sa

hingpit nga kalamposan taliwala sa hagit sa pandemya.

Niini, si Konsehal Suzette kusganong mipasalamat sa IsDa sa ilang pag-abag sa kagamhanan ug malaomon sa dugang pang kolaborasyon dili lamang ning panahon sa pandemya.

Sa laing bahin, mipaabot usab si Suzette sa iyang kinasing-kasing nga pagpasalamat ngadto sa buhatan sa CSWD, Barangay Officials, tanang frontliners ug ingon man sa mga empleyado sa City Hall nga naningkamot gayud nga madali ang pagtunol sa Cash

Ayuda taliwala sa kainit ug maulan nga panahon mahatod lang kini ngadto sa tanang benepisaryo.