Mga gitinguhang programa, proyekto sa Barangay 35 mapatuman na

MAHIMO nang ipatuman sa Barangay 35 ang mga gitinguhang programa ug proyekto nga gipundohan karong tuiga.

Kini human ang Konseho sa Syudad atol sa ilang sesyon kagahapon nga  nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay  nga  diin nasukip ang ilang 2024 Annual Budget nga adunay gibanabanang kinitaan ug galastohon balor P6,281.849.00.

Lakip sa gipundohan mao ang 20 porsyentong development fund balor P 720,636.00 samtang P 628,185.00 usab ang gigahin alang sa pagpatuman sa mga programa sa Sangguniang Kabataan; P94,228.00 alang sa ilang quick response fund; P 520,636.00   alang sa pag-rehabilitar sa drainage system ug uban pang mga programa nga gilantawng maghatag kaarangan sa ilang serbisyo ngadto sa katawhan.

Ang annual budget sa Barangay 35 miagi sa makuting pagtuon sa mga komite sa konseho ug nasuta nga nahiuyon sa balaod ug mahimong nang ipatuman sa labing dali nga panahon.

Ang resolusyon nga  gisagop  sa konseho alang sa nasangpit nga katuyuan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.