Mga gihan-ay programa, proyekto sa Brgy. Baikingon mapatuman na

MAHIMO nang ipatuman sa Barangay Baikingon ang ilang mga gihan-ay nga mga programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 annual budget nga adunay gibanabanang kinitaan ug galastohon balor P6,258,052.

Lakip sa gipundohan mao ang 20 porsyentong (20%) development fund balor P885,972; samtang P625,805 usab ang gigahin alang sa pagpatuman sa mga programa sa Sanguniang Kabataan; P312,903 alang sa barangay disaster risk reduction management fund; P25,714 sa programa sa senior citizen ug persons with disabilities ug uban pang mga programa nga gilantawng maghatag og dugang kaarangan sa ilang serbisyo ngadto sa katawhan.

Ang 2024 annual budget sa Barangay Baikingon miagi sa makuting pagtuon sa komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.