Mga gihan-ay nga proyekto sa Brgy. 38 mapatuman na

MAHIMO nang ipatuman sa Barangay 38 ang ilang gihan-ay nga mga programa ug proyekto nga gipundohan sa ilang 2024 budget.

Kini human ang konseho sa syudad sa sesyon sa Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 annual budget nga adunay gibanabanang kinitaan ug galastuhon balor P3,358,958.

Lakip sa gipundohan mao ang 20 porsyentong (20%) Development Fund balor P335,392; samtang P335,896 usab ang gigahin alang sa pagpatuman sa mga programa sa Sangguniang Kabataan; P167,948 alang sa pagpamalit sa mga supplies ug ekipo sa Barangay Disaster Risk Reduction Management; P265,392, alang sa rehabilitasyon sa ilang drainage system ug uban pang mga programa nga gilantawng maghatag kaarangan sa ilang serbisyo ngadto sa katawhan.

Ang 2024 annual budget sa Barangay 38 miagi sa makuting pagtoon sa mga komite sa konseho ug nasuta nga nahiuyon kini sa balaod ug mahimong ipatuman sa labing dali nga panahon.

Ang resolusyon nga gipalabang sa konseho gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.