Mga gihan-ay nga programa, proyekto sa Barangay 7 mapatuman na

MAPATUMAN na sa Barangay 7 ang ilang mga gihan-ay nga programa ug proyekto nga gipundohan karong tuiga.

Kini human ang Konseho sa sesyon  niadtong Lunes nga  gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastohon balor P4,051,066.00.

Lakip sa gipundohan mao ang 20% Development Fund balor P445,120.00 diin nakahan-ay niini ang pag-instalar ug solar lights sa ilang mga pathway, pag-rehabilitar sa ilang Health Center, declogging sa drainage ug uban pang mga programa nga gilantawng maghatag dugang kaarangan sa ilang serbisyo ngadto sa katawhan.

Samtang P405,107.00 usab ang gigahin alang sa pagpatuman sa mga programa sa Sangguniang Kabataan (SK).

Ang 2024 Annual Budget sa Barangay 7 miagi sa makuting pagtoon sa mga komite ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa nasangpit nga katuyoan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.