Mga gihan-ay nga programa, proyekto sa Barangay 19 mapatuman na

HINGPIT nang mapatuman sa Barangay 19 ning syudad ang ilang mga proyekto ug programa nga gihatagan nila og prioridad karong tuiga.

Kini human ang konseho atol sa sesyon niadtong Lunes nga gidumala ni Bise Mayor Kikang Uy misagop sa resolusyon nga nag-uli sa ordinansa sa barangay diin nasukip ang ilang 2022 Annual Budget nga adunay gibanabanang kinitaan nga mobalor sa P3,318,556.00.

Lakip sa gigahinan ug gihatagan sa prioridad mao ang pagpalambo sa ilang mga infrastructure projects sa barangay ingon man ang programa sa panglawas.

Migahin usab ang barangay og 5% sa Calamity Fund, 10% nga pundo alang sa Sangguniang Kabataan ug ubang pang mga programa ug proyekto nga gilantaw’ng makahatag ug dugang kalamboan sa kinabuhi sa katawhan sa barangay.

Ang resolusyon nga gisagop sa konseho alang sa nasangpit nga katuyoan gipaluyohan sa komite sa Barangay Affairs ni Konsehal Yan Lam Lim ug komite sa pamalaod ug reglamento ni Konsehal Ian Mark Nacaya.