Mga employers nga misalmot sa job fair gipasalamatan ni Abbu

SI Konsehal Joey Abbu, Jr., Chairman sa Komite sa Labor, kusganong nagpasalamat sa 35 ka lokal ug 6 ka overseas employers nga misalmot sa job fair aron mahatag ang opurtunidad nga makasulod sa trabaho ang mga kwalipikadong kabatan-onan sa dakbayan.

Kini human nagmalamposon kagahapon atol sa gipahigayong Kahigayonan 2024: Skills Training Expo and Job Fair diha sa Centrio Mall nga gitanyag niadtong mga Out of School Youth (OSY) nga nag-edad 18 hangtod 30 anyos nga wala pay mga trabaho.

Nasayran nga ang maong kalihokan nunot sa kasaulogan sa International Youth Day matag Agosto 12 nga may tema: From Clicks to Progress: Youth Digital Pathways for Sustainable Development” ug kabahin usab sa pagsaulog sa Oro Youth Month matag bulan sa Agosto.

Niini, hugot usab nga gipasalamatan ni Konsehal Abbu ang kagamhanan sa dakbayan sa pagmugna sa maong job fair sa pagpangulo sa Oro Youth Development Office, Sangguniang Kabataan Federation ug Out of School Youth Development Alliance (OSYDA) kay daghang kabatan-onan ang nahatagan og kahigayonan nga makabaton og dugang kaugmaran sa ilang panginabuhian.