Mga Delinkwenteng Stall Rentals gipanas

Hayan mahatagan sa kahupay sa ilang bayronon ang mga mamaligyaay sa kamerkadohan nga delinkwente na sa ilang abangan sa mga talad.

Kini human ang konseho sa syudad ubos ni Bise Mayor Bebot Rodriguez sa sesyon niadtong Lunes hiniusang mipalabang sa ordinansa nga nag-amendar sa probisyon sa Section 2(d) sa Ordinance No. 14385-2022 kon Tax Relief Ordinance of 2022.

Ubos sa kabag-ohan, gipanas ang tanang arrears, surcharges, interest ug penalties sa mga delinkwenteng stall rentals sa tanang merkado publiko ug mga terminal dinhi sa dakbayan sa Cagayan de Oro alang sa tuig 2021 paubos.

Si Konsehal Ian Mark Nacaya, chairman sa komite sa economic enterprises, mibutyag nga ang maong pribilihiyo matagamtaman sa mga mamaligyaay sa kamerkadohan kun ilang mabayran ang tibouk nilang abangan sa tuig 2022 sugod sa petsa sa pag-aprobar sa mayor sa maong ordinansa.

Kun dili makasunod sa maong kondisyon ang usa ka mamaligyaay dili usab siya kwalipikadong makapahimulos sa gihatag nga kondonasyon sa gobyerno, sumpay ni Nacaya.

Niini, malaumon ang mga sakop sa konseho nga makatabang sa nasinating kalisod sa mga mamaligyaay sa kamerkadohan ang gitanyag nga kondonasyon.