Mga balaod angayan masunod bahin sa machine betting sa bulangan -Abbu

“WALA man akoy pagsupak sa cockfighting basta masunod lang ang mga batakang balaod sa nasud ug ang atong lokal nga ordinansa”.

Kini ang reaksyon ni Konsehal Joey Abbu, Jr., chairman sa komite sa labor and employment, atol sa miaging sesyon sa Konseho nga gidumala ni Bise Mayor Bebot Rodriguez, samtang gituki ang isyu sa machine betting kalabot sa aplikasyon sa Indahag Square Garden alang sa pagpahigayon og 4-Stag 4-Cock Combo Derby sa Enero 15, 2025, sa Sitio Lomboy, Barangay Indahag.

Sa pamahayag ni Konsehal Romeo Calizo nga bisan pa man usa siya sa mahiligon sa sabong, apan adunay dakong kabalaka ang konsehal kabahin sa koleksyon sa syudad kon ipatuman ang machine betting.

Gipasabot ni Calizo nga sa tradisyonal nga sabong, adunay bayad ang entrance sa tawo nga mosulod ug marekord kung pila ka sultada ang matag entry sa derby nga maoy basehan sa koleksyon sa kita sa syudad. Asa naman kuhaon ang revenue nga ang sistema didto naman ang betting sa machine nga kontrolado sa Apps diin ang tag-iya na sa apps ang mokita.

Niini, si Konsehal Abbu mipahayag sa iyang pagsupak sa maong aplikasyon sa Indahag Square Garden ug misugyot nga kini angayan pang pagatun-an aron maseguro nga masunod gayod ang balaod ug dili maalkanse ang syudad.