Mga bag-ong iskolar sa dakbayan gipahalipayan ni Konsehal Suzette

ANG akong mainitong pahalipay sa tanang bag-ong kwalipikadong Iskolar sa Dakbayan (IsDa) ning tuig 2021.

Kini ang pamahayag ni Konsehal Suzette Magtajas-Daba, chairman sa komite sa edukasyon human natapos ang makuting proseso sa pagsala sa mga aplikante.

Nasayran nga mokabat sa 2,056 ka tinun-ang migradwar sa sekundarya o mga incoming first year college ang gipaabot nga makapahimolos sa City College Scholarship Program (CCSP)

karong tuig 2021-2022.

Gani, gipasalamatan sa konsehal ang kagamhanan sa dakbayan nga taliwala sa hagit sa pandemya walay puas kining naghatag og prayoridad sa edukasyon ug padayon nga gipatuman ni Mayor Oscar Moreno ang CCSP o IsDa sa tingoha nga walay kabataan ang mapihig sa edukasyon.

Kanunay akong moingon, nga anaa sa edukasyon ang tubag aron maputol ang kapobrehon, atong putlon kini nga cycle pinaagi sa paghuman sa pag-eskwela kay dili angayang ihatag sa sunod nga henerasyon ang kapobrehon ug ang kalisod sa kinabuhi, pamahayag sa konsehal.

Niini, gipahalipayan ni konsehal Daba ang tanang IsDa ug mipahinumdom nga ampingan ang kahigayonan nga gitanyag sa gobyerno nga libreng edukasyon kay alang kini sa ilang kaugmaon.