Med, Law scholarships gitanyag sa City Hall

Mahatagan na sa katumanan ang programa sa kagamhanan sa dakbayan nga magtanyag og scholarship grant ngadto sa mga Kagay-anong buot mokuha sa kursong medicine ug law.

Kini human giuyonan sa konseho sa syudad sa sesyon niadtong Lunes ang managlahing ordinansa nga naghatag og katungod ni Mayor Klarex Uy pagpirma sa Memorandum of Agreement tali sa Liceo de Cagayan University, University of Science and Technology of Southern Philippines (USTP) ug Xavier University – Ateneo de Cagayan nga naglangkob sa kolaborasyon alang sa pagpatuman sa scholarship program sa dakbayan.

Ubos sa MoA mao ang Medical Scholarship Program (MSP) ug Law Scholarship Program (LSP) nga maglangkob sa tibouk nga graduate program ug kansang course option matumbok sa Scholarship Board.

Niini, ang palaran nga makabenepisyo modawat usab og stipend. Ubos sa MoA, mahimong makapahimulos sa programa kadtong mga Filipino nga residente sa Cagayan de Oro, adunay dili molabaw sa P450 mil nga combined annual family income, mogradwar o’ gradwado sa undergraduate program sa institusyon nga rehistrado sa CHED, latin honor o’ adunay 85% general weighted average sa bachelor’s degree, incoming freshman sa pagsulod sa medical o’ law school, walay record nga nakatungha na o’ na-drop sa laing medical o’ law school, pasado sa NMAT o’ law school entrance exam ug angayang makapasar sa panel interview sa LGU-CSO review and screening committee.

Ang mga universidad nga mahimong makuha ang MSP naglangkob sa Liceo, USTP ug Xavier-Ateneo samtang ang LSP mahimong makuha dinha sa Liceo ug Xavier University. Dako ang paglaum sa konseho pinaagi ni Bise Mayor Bebot Rodriguez nga dili lang ang kabataan nga adunay damgong mahimong doctor o’ abugado ang matabangan sa programa kun dili ang dakbayan usab nga makaangkon og dugang mga doctor ug abugado sa umaabot nga mga panahon.