Massive spay ug neuter diha sa kabarangayan gisugyot ni Pascual

KINAHANGLAN maghimo og massive spay and neuter sa kada barangay ug ma-edukar ang mga pet owners sa pamaagi aron mapugngan ang ilang mga iring ug iro sa pagpanganak.Kini ang gisugyot ni Konsehal Jay Pascual atol sa hiniusang tigom sa komite sa agriculture ug komite sa panglawas ni Konsehal Malou Gaane human gituki ang sugyot pag-revise sa  Ordinance No. 9852-2005 nga naila isip Animal Control and Welfare Ordinance sa dakbayan.

Matod ni Pascual nga kung adunay masubsob nga pagpangapon sa iring ug iro ilabina sa hinterland barangay, maminusan ang pagdaghan sa iro diha sa kadalanan.

Gipasabot sa konsehal nga normal ra kaayo didto sa bukid nga walay koral ang mga balay hinungdan nga dali ra kaayo  magsanay ang laaw nga mga iro nga usa sa hinungdan pagkaylap sa rabies ug sa kaso sa dog bites.

Si Acting City Veterinarian Dr. Helen Ann Tacandong mibutyag nga aduna lamang P2 milyones nga gahin alang sa 2,500-3,000 spay and neuter ug ang ilang buhatan nagpahigayon kada Huwebes alang sa 100 ka iro ug iring.

Dugtong ni Dr. Tacandong nga dili ma-implementar ang 70%-80% vaccination coverage kay aduna lamang P2.8 milyones nga pundo alang sa 60 mil nga doses sa bakuna sa rabies ug karon anaa na sa kapin 100 mil ka iro ug iring ang syudad.

Kini usab ang hinungdan nga ang ilang buhatan dili makapahigayon og massive spay and neuter sa kabarangayan tungod sa kakulangon sa pundo, sumpay ni Tacandong. (RNQuiblat/SP)