Mapatuman na sa Brgy. 7 ang ilang dugang mga proyekto

MAPATUMAN na ang dugang programa ug proyekto sa Barangay 7 nga gipundohan karong tuiga.

Kini human ang Konseho sa Syudad sa milabayng sesyon nga gidumala ni Bise Mayor Bebot Rodriguez misagop sa resolusyon nga nag-uli sa ilang ordinansa diin nasukip ang ilang 2025 Supplemental Budget nga adunay kinitaan ug galastuhon balor P389,000.00.

Lakip sa gipundohan mao ang pagbutang sa cctv camera nga adunay TV monitor palibot sa ilang barangay balor P169,000.00; samtang P220,000.00 usab ang gigahin alang sa pag-rehabilitar sa ilang barangay tanod outpost nga diin gilantawng maghatag kaarangan sa ilang pagpatuman sa kahusay ug kalinaw sa dapit.

Ang 2025 supplemental budget sa Barangay 7 miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas. (MLRapanot/SP)