Mall hours gihangyong malugwayan

Hugot nga gihangyo ni Konsehal George Goking ang mga tag-iya ug tigdumala sa mall nga malugwayan ang oras sa operasyon sa mga mall aron mahatagan ang tanan og kahigayonan sa pagpamalit ilabina ang mga kawani, langyaw, ug konsumedor nga motambong sa ipahigayong Kahimunan Regional Trade Fair 2023.

Ang kalihokan nga gipasiugdahan sa Department of Trade Industry (DTI) ipahigayon diha sa SM City CDO Uptown sa umaabot Agosto 18-29, 2023.

Gipasabot sa konsehal nga ang lugway sa mall hours makahatag og kahigayonan sa mga empleyado nga makapamalit nga dili mahasol sa oras tingtrabaho.

Si Goking, Chairman sa Komite sa Trade and Commerce, miingon nga angayan suportahan ang kalihokan sa Kahimunan Regional Trade Fair aron ma-promote ang mga produktong lokal ug mahatagan sa dugang kalamboan ang ekonomiya.

Ang pagpahigayon sa Trade Fair nunot sa kasaulogan sa kapistahan ni Sr. San Augustine sa umaabot Agosto 27-28, 2023.

Malaumon si Goking nga mahatagan sa positibong aksyon sa tag-iya ug tigdumala sa SM City Uptown ang hangyo sa panahon sa pagpahigayon sa maong trade fair.