Makuting pagtuon sa panawagan mapanumbalik ang curfew hours gisugyot

DAKO ang kahingawa ni Konsehal Bernie Esparcia, vice chairman sa komite sa arbitration, sa sunod sunod nga krimen nga nahitabo dinhi sa dakbayan.

Kini ang sumpay sa konsehal sa special report ni Konsehal Roger Abaday atol sa sesyon niadtong Lunes nga gidumala ni Bise Mayor Bebot Rodriguez kalabot sa tukmang kahimtang sa kahusay ug kalinaw sa syudad.

Matod ni Esparcia nga kinahanglan nga hatagan sa igong pagtagad ang mga panghitabo ilabina nga nakahatag kini og kabalaka sa katawhan ug aduna usay mga panawagan nga ibalik ang pag-imposar sa curfew hours.

Angayang tun-an pag-ayo ang sugyot tungod kay anaa pa sa pagbangon ang ekonomiya sa syudad, dugang sa konsehal.

Hinuon iyang giklaro nga ang sumbanan sa malambuong syudad mao ang kalinaw diin ang katawhan kampante ug luwas nga maglakaw bisan panahon sa gabii.

Niini, gisugyot ni Konsehal Esparcia nga mahisgutan kini sa hintungdang komite sa konseho aron usab ma-review ang curfew ordinance. (SP/JRGalano)