Macabalan SK naninguha mapalambo kinabuhi sa kabatan-onan

KAPIN sa P1.2 milyones ang gigahin sa Sangguniang Kabataan (SK) sa Barangay Macabalan alang sa programa pagpalambo ug paghatag og gahum sa kabatan-onan.

Sa sesyon sa Konseho kagahapon nga gidumala ni Bise Mayor Bebot Rodriguez, gisagop ang resolusyon nga nag-uli sa resolusyon sa Barangay Macabalan diin nasukip ang 2023 SK Annual Budget nga adunay gibana-banang kinitaan ug galastohon balor P2,791,416.00.

Lakip sa gipondohan sa SK sa barangay ang programa sa edukasyon ilabina ang paghatag og dugang kahibalo sa kabataan sa natad sa panglawas, pagproteher sa kinaiyahan, pagpangandam aron mamintinar ang kahusay ug kalinaw sa dapit ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang kinabuhi.

Gihatagan usab sa prayoridad sa SK sa barangay ang pagpalit og usa ka unit water dispenser balor P50 mil, projector balor 50 mil, 4N1 printer balor P110 mil ug furniture and fixtures balor P50 mil nga magamit sa buhatan.

Ang resolusyon nga gipasaka sa konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Edgar Cabanlas.